| اے مرے خدا مرے چارہ گر مرے چارہ گر |
| مرے غم کا کوئی علاج کر مرے چارہ گر |
| سب کی راتیں کالی ہیں دکھ نہیں کہ ازل سے تھیں |
| مرے دن بھی کالے ہیں غور کر مرے چارہ گر |
| سبھی رنج و غم تجھے علم ہے بے نفوس ہیں |
| مری جان پہ بنے معتبر مرے چارہ گر |
| سبھی خواب میرے یا کٹ گئے یا سمٹ گئے |
| انہیں زندہ کر انہیں زندہ کر مرے چارہ گر |
| مری داستاں نہ ثقیل ہے نہ طویل ہے |
| بڑی پُر سکوں بڑی مختصر مرے چارہ گر |
| کبھی کیا تھا مَیں کہاں آ گیا تجھے علم ہے |
| رہوں کب تلک یونہی در بدر مرے چارہ گر |
| نہ تو پہلے کوئی غنیم تھا نہ ابھی کوئی |
| ہے غنیمِ جاں مرا راہبر مرے چارہ گر |
| تری وسعتوں میں کمی ہے کیا اے مرے خدا |
| ہمیں بھیج دے کوئی خوش نظر مرے چارہ گر |
معلومات