| مٹی سے میں بنایا گیا پہلی بار تھا |
| کچھ نور سے بنے ہوئے ، اک ابنِ نار تھا |
| تھا وہ عبادتوں میں گر اتنا ہی معتبر |
| اس کو پھر ایک سجدے میں کیوں اتنا عار تھا |
| منزل تو دور تھی ابھی ، چلنا ہوا کٹھن |
| میں آبلہ پا مبتدئِ رہگزار تھا |
| واقف نہیں ہوا ہوں گلوں سے جو ، اب تلک |
| جس راستے چلا ہوں ، وہی خارزار تھا |
| باندھا تھا میں نے رختِ سفر سوچ کر یہی |
| شاید اسے بھی میرا کہیں انتظار تھا |
| دل پا گیا سکوں مرا اتنا ہی جان کر |
| اس کا بھی دل مرے لئے ہی بے قرار تھا |
| معلوم تو نہ تھا کہ فنا میں ہی ہے بقا |
| جاں اس لئے لُٹا دی ، مجھے اس سے پیار تھا |
| طارق کہاں کہاں گئے اس کی تلاش میں |
| شہ رگ سے بھی قریب اگرچہ وہ یار تھا |
معلومات