| جانے کتنے ہی غم سہہ گئے ہیں |
| ہم ستم در ستم سہہ گئے ہیں |
| دشمنِ جاں بنی ہے یہ فرقت |
| بے رخی تو صنم سہہ گئے ہیں |
| کیا بتائیں تمہیں وقت رخصت |
| ہو گئی آنکھ نم سہہ گئے ہیں |
| آ گئے ہو نئے زخم دینے |
| بولئے پہلے کم سہہ گئے ہیں |
| لو ترا بے وفا بے مروت |
| رکھ لیا ہے بھرم سہہ گئے ہیں |
| یاد رکھنا کسی سے نہ کرنا |
| تلخ باتیں جو ہم سہہ گئے ہیں |
| دل جلانے کو اک مسکراہٹ |
| تیرے لب کی قسم سہہ گئے ہیں |
| سہہ گئے وار تیری ادا کے |
| زلف کے پیچ و خم سہہ گئے ہیں |
| کم سہے ہیں مبشر کسی نے |
| جتنے اب تک الم سہہ گئے ہیں |
معلومات