| یہ جو حرکت ہے یہ ، از روزِ ازل لکھی ہے |
| ہے وہ گردش کہ نہ ہو جس میں خلل لکھی ہے |
| دائرے سارے مقرّر ہیں جہاں چلنا ہے |
| اس کی تعمیل بِلا ردّ و بدل لکھی ہے |
| تا ابد کس کی رفاقت ہے رہی دنیا میں |
| سب کی تقدیر میں آخر کو اجل لکھی ہے |
| اُنس کا یوں تو مرکّب ہے جو انسان ہے وہ |
| پھر بھی دنیا میں بہت جنگ و جدل لکھی ہے |
| آج تک میں یہ معمّہ نہ سمجھ پایا ہوں |
| وہ کوئی اور ہے جس نے مری کَل لکھی ہے |
| مجھ کو تدبیر کا مختار بنایا لیکن |
| ہو وہی چاہے جو ، تقدیر ، اٹل لکھی ہے |
| ہم ترے حسن کی تعریف میں کچھ کہہ دیں گے |
| لوگ سمجھیں گے کہ طارق نے غزل لکھی ہے |
معلومات