| غزل |
| دست و بازو پہ سجی شوخ حنا یاد رہی |
| کھل کھلا کر ترے ہنسنے کی ادا یاد رہی |
| بھول کر ہجر کے صدمے وہ اکیلی راتیں |
| ہنستی آنکھوں میں چمکتی وہ حیا یاد رہی |
| تلخ ماضی کے حوادث کو فراموش کیا |
| دَوست، دُشمن رہیں آباد دُعا یاد رہی |
| وقت نے یاد کے سب نقش مٹائے لیکن |
| کوۓ جاناں کی مہکتی وہ ہوا یاد رہی |
| خود فراموش ہیں احسان فراموش نہیں |
| محسنوں کی ہمیں اک ایک عطا یاد رہی |
| جیسے اغیار کے اخلاص و وفا یاد رہے |
| عین ُاس طرح سے اپنوں کی ریا یاد رہی |
| بھول جاتا ہوں بھلکڑ ہوں شہاب احمد میں |
| بھول جانا تھی جو اک بات سدا یاد رہی |
| شہاب احمد |
| ۱ جون ۲۰۲۲ |
معلومات