| یوں تو نہیں کہ وہ کبھی تنہا نہیں گیا |
| محفل سے اُٹھ کے پر وہ اکیلا نہیں گیا |
| سودا ضمیر کا یہاں پہلے بھی تو ہوا |
| پہلے یہ کھیل کیا کبھی کھیلا نہیں گیا |
| میں جب بھی اس کے حسن کا قصّہ بیاں کروں |
| کہتے ہیں تم سے ٹھیک سے دیکھا نہیں گیا |
| موقع ملا جسے وہ بہانہ کرے گا کیا |
| کیوں اس سے اس مقام پہ بیٹھا نہیں گیا |
| تم نے کہاں وفا سے نبھائی ہے دوستی |
| کہتے ہو ٹوٹ کر مجھے چاہا نہیں گیا |
| اس کو بھی لوٹ آنے پہ احساس یہ ہوا |
| وہ دور خود گیا تھا کنارا نہیں گیا |
| پچھتا رہا تھا وہ جو گیا چھوڑ کر کبھی |
| آیا تو لوٹ کر وہ دوبارہ نہیں گیا |
| تخلیقِ کائنات سے طارق ہو یہ عیاں |
| دن رات کو یونہی تو بنایا نہیں گیا |
معلومات