| حاکم و عادل کے جب منصب کا پردہ کُھل گیا |
| عام لوگوں سے چھپا مذہب کا پردہ کُھل گیا |
| اپنی اپنی ہر کوئی سمجھا تھا بہتر فکر کو |
| سچ پہ جو قائم تھا اس مکتب کا پردہ کُھل گیا |
| چاند سا مکھڑا چھپا رکھا تھا کب سے زلف نے |
| زلف لہرائی جو اس نے شب کا پردہ کُھل گیا |
| گرچہ رکھا دیر تک مٹّی نے ہم کو ڈھانپ کر |
| صاف کی تصویر جب ہم سب کا پردہ کُھل گیا |
| دیکھ پائے آنکھ وہ اُٹھنے کی ہمّت جس میں ہو |
| طور پر اترا ہے جب کیا رب کا پردہ کُھل گیا |
| پوچھتے ہو کیا کسی نے اس کو دیکھا ہے کبھی |
| دیکھنے والوں کا اس سے کب کا پردہ کُھل گیا |
| نام لے کر دیں کا دھوکہ دے رہے ہیں کون لوگ |
| ہو گئے ہیں سب عیاں اس ڈھب کا پردہ کھل گیا |
| راز داری اس نے رکھی تھی تعلق کی مگر |
| اس نے خود ظاہر کیا جب تب کا پردہ کُھل گیا |
| دیکھ کر ساقی کو طارق لوگ پہچانیں نہ جب |
| کون پیتا ہے کہاں مشرب کا پردہ کُھل گیا |
معلومات