| جلا کر دل کو میرے خاک کر دے |
| گھڑی بھر میں یہ قصہ پاک کر دے |
| بعید از سرحدِ ادراک کر دے |
| شباب اور حسن کو بیباک کر دے |
| کسی بھی پل خِلافِ عقل و دانش |
| کرشمہ کیا بتِ چالاک کر دے |
| میں اس " تبدیلی " کا ہوں اک مقلد |
| جو خس کم اور جہاں کو پاک کر دے |
| اترتے ہی مری دریا میں کشتی |
| ہوا موجوں کو اور سفاک کر دے |
| سمجھ مت عشق کی چنگاری کو کم |
| شرر اک سارا جنگل راکھ کر دے |
| لگی اک چھوٹی سی بھی ٹھیس دل پر |
| ہماری آنکھوں کو نمناک کر دے |
| ذرا سی دیر کو آۓ پہ طوفاں |
| بھری بستی خس و خاشاک کر دے |
| یوں کہنے کو یہ بارش کا ہے قطرہ |
| صدف کے دل کو لیکن چاک کردے |
| تجھے معلوم ہے محشر کو برپا |
| تری کاکل کی اک پیچاک کر دے |
| اثر کوئی تو سوزِ شمع میں ہے |
| جو پروانوں کو مشتِ خاک کر دے |
| بڑا اعزاز اس نے اپنا جانا |
| کہ جس کو تو سپردِ خاک کر دے |
| ذرا سی جستجو اپنی ہے لیکن |
| تَہ و بالا زمیں افلاک کر دے |
| مجھے پھر عاقبت کی فکر کیوں ہو |
| شفاعت گر شہِ لولاک (ص) کر دے |
معلومات