| جانتی تھی کیا براہیمی نظر اِس راز کو |
| آگ ہو جائے گی ٹھنڈی دیکھ کر جانباز کو |
| اب تو اس کی ہر ادا پہلے سے بڑھ کر ہے حسیں |
| عشق نے صیقل کیا ہے حسن کے انداز کو |
| گُفتگو اس سے کئے بِن رہ نہ سکتے تھے کبھی |
| اب تو بتلاتے نہیں وہ درد بھی ہمراز کو |
| ابتدا میں ایک سجدے سے گریزاں جو ہوا |
| آج بھی مانے ہے کب انسان کے اعزاز کو |
| جو چٹانیں چھوڑ کر اب آگیا محلوں میں ہے |
| کیا ممولے سے لڑائے گا کوئی شہباز کو |
| آسماں سے جس کا اپنا رابطہ ہے ہی نہیں |
| روک پائے گا بھلا کیسے مری پرواز کو |
| میں نے تو ہر سمت دے دی ہے صدائے صبحِ نو |
| کوئی شاید جاگ جائے سن کے اس آواز کو |
| کیوں مریضِ وقت کا ملتا نہیں کوئی طبیب |
| ڈھونڈتی پھرتی ہیں نظریں گو کسی اعجاز کو |
| پھر نظر آئے گا موسٰی پھینکتے اپنا عصا |
| ہارتے دیکھیں گے پھر لائے جو نو سر باز کو |
| بے تکلّف لوگ بھاتے ہیں مرے دل کو بہت |
| کیسے رد کرتا بھلا پھر دعوتِ شیراز کو |
| طارق اہلِ شہر سے اپنا بھروسہ اُٹھ گیا |
| ڈھونڈتے ہیں گاؤں میں چل کر کسی دم ساز کو |
معلومات