| غم اور خوشی کا زندگی اک امتزاج ہے |
| شعلوں سے پُر حیات کا منبع سراج ہے |
| انصاف کا ہو خون تو جڑ ہے فساد کی |
| بد ظنّی کا مرض ہو تو وہ لا علاج ہے |
| ناراض ہو وہ خوش بھی ہو چھوٹی سی بات پر |
| ربّ کا بھی اپنے بندے سے ملتا مزاج ہے |
| قائل ہیں لوگ چھوڑنے کے بد رسوم کو |
| کہتے ہیں خاندان میں رائج رواج ہے |
| جھکنا پڑے نہ ہر جگہ گر اتنا جان لے |
| بندے کو اک خدا ہی کی بس احتیاج ہے |
| نفرت کو چھوڑ دے جو تعصّب سے ہو کے دور |
| سر پر اسی کے آج محبّت کا تاج ہے |
| نفرت نہ ہو کسی سے محبّت سے سب رہیں |
| اس پر عمل کرے جو بھلا کون آج ہے |
| اپنے وطن میں کالے کا جینا ہوا محال |
| کالے ہیں اب وہاں جہاں گوروں کا راج ہے |
| جس کو بھی آسرا ملا باہر کی اور کا |
| اس آسرے پہ چھوڑ چکا کام کاج ہے |
| طارق امید پر خدا کی گھر ہے چل رہا |
| بندے کی کچھ نہ کچھ تو خدا رکھتا لاج ہے |
معلومات