| حسیں کوئی آقاﷺ کے جیسا نہیں ہے |
| کسی آنکھ نے ان سا دیکھا نہیں ہے |
| گو مشہور ہے حسنِ یوسفؑ جہاں میں |
| مگر کوئی آقاﷺ کے جیسا نہیں ہے |
| وہ خاتِم بھی ہیں اور خاتَم بھی وہ ہی |
| نبی بعد آقاﷺ کے آنا نہیں ہے |
| تصور ہے دل میں مدینے کا ہر پل |
| کہیں اور دل میرا لگتا نہیں ہے |
| اطاعت میں انﷺ کی شفاعت ملے گی |
| بجز انﷺ کے کوئی وسیلہ نہیں ہے |
| یوں محبوب رب کو تو سب انبیاء ہیں |
| محمدﷺ سا کوئی دلارا نہیں ہے |
| زمیں آسماں ہو مکاں لا مکاں ہو |
| کہاں میرے آقاﷺ کا چرچہ نہیں ہے |
| محمدﷺ ہیں احمدﷺ ہیں محمودﷺ وہ ہیں |
| کوئی اسم آقاﷺ سے اچھا نہیں ہے |
| اطاعت نبیﷺ کی ہے رب کی اطاعت |
| نبیﷺ کا نہیں جو وہ رب کا نہیں ہے |
| مرے آقاﷺ پہنچے ہیں عرشِ معلیٰ |
| نبی دوسرا کوئی پہنچا نہیں ہے |
| مکرم ہیں سارے نبی ہم نے مانا |
| کسی کا محمدﷺ سا رتبہ نہیں ہے |
| الہی مدینہ کی تربت عطا کر |
| علاوہ ازیں اور تمنا نہیں ہے |
| الہی بلا لیجے احسنؔ کو اب تو |
| مدینہ کبھی اس نے دیکھا نہیں ہے |
معلومات