| دیکھنے پر اسے ان آنکھوں سے اصرار نہ کر |
| دل کی آنکھوں سے اسے دیکھ یوں انکار نہ کر |
| آدمی ہوتا ہے انسان فرشتہ تو نہیں |
| ہو خطا اس سے تو رسوا سرِ بازار نہ کر |
| جو چلا آیا ترے پاس امیدیں لے کر |
| دے بشارت اسے یوں خُو گرِ انذار نہ کر |
| اے مرے دشمنِ جاں سن تو سہی بات مری |
| سازشیں کر کے بہانہ پسِ دیوار نہ کر |
| گر محبّت ہو کہیں ذکر بھی لب پر آئے |
| کون کہتا ہے تجھے عشق کا اظہار نہ کر |
| عاجزی عقل سکھاتی ہے خودی پاگل پن |
| فیصلہ دل کے مقابل سرِ پندار نہ کر |
| کامیابی ہی مقدّر میں لکھی ہے تیرے |
| کی جو محنت اسے عُجلت میں تُو بیکار نہ کر |
| طارق آ جائے گا تجھ کو بھی محبّت کا جواب |
| بد گمانی سے یونہی خود کو گنہ گار نہ کر |
معلومات