| آہ شیخ الہنؒد تیری روح کو پہونچے قرار |
| آج تیرے جانشینوں میں نہیں وہ دل فگار |
| ڈھونڈتی ہے آنکھ میری سرفروشوں کو ترے |
| کون ہے جانباز تیرا ملک و ملت پر نثار |
| اولاً تو قعرِ دریا میں نہیں کوئی گہر |
| ہوں بھی گر تو کون ہے غواص اور گوہر نگار |
| رفتہ رفتہ شمع سے بیزار پروانے ہوئے |
| ہیں کہاں وہ سوزِ دل جو ہوں سراپا اضطرار |
| جو جلا کر خاک کر دے دشمنِ اسلام کو |
| آج سینے میں کہیں باقی نہیں ہے وہ شرار |
| کوئی گوہر تیرے دریائے عزائم میں نہیں |
| مدنؒی و سندھؒی کے جیسے حوصلوں کے کوہسار |
| مے کشوں کو ساقیا پھر سے کہیں سے ڈھونڈ لا |
| مے کدہ سنسان ہے کھوۓ گئے ہیں بادہ خوار |
| دین کی غیرت حمیت کے کہاں ہیں پاسباں |
| ان کی جرأت کے نمونے جانفشاں وہ شہسوار |
| تھک گیا میں چور ہوں زخموں سے میں رنجور ہوں |
| آج پھر سے ہے مرا دل اس قدر کیوں بیقرار |
| پاسبانِ عظمتِ اسلام یہ دار العلومؔ |
| ڈھونڈتا ہے پھر انہیں کو ایشیا کا شاہکار |
| |
| عزمِ شیخ الہنؒد سے ہستی مری معمور ہو |
| کر رہا فریاد یارب! تجھ سے شاہؔی خاکسار |
معلومات