| غزل۔ |
| ہر پَل سُنہرے خواب سجاتا ہے رات بھر |
| تیرا خیال دل میں سماتا ہے رات بھر |
| تنہائیوں کے ساز پہ خاموشیوں کا گیت |
| پُر سوز اِس قدر ہے رلاتا ہے رات بھر |
| مانا کہ شمع جلتی رہی ہے تمام شب |
| کوئی لہو جگر کا جلاتا ہے رات بھر |
| چہرہ ترا نظر سے ہٹائے نہ ہٹ سکا |
| صحراۓ غم سراب دکھاتا ہے رات بھر |
| کیونکر نہ دل کے حال پہ افسردہ ہو فلک |
| تنہا غموں کا بوجھ اٹھاتا ہے رات بھر |
| کتنے حسین خواب حقیقت میں کھو گئے |
| حسرت سے دل حساب لگاتا ہے رات بھر |
| چپکے سے آ کے درد کی دہلیز پر کوئی |
| زخموں پہ پھول لا کے چڑھاتا ہے رات بھر |
| کوئی تو ہے جو لُوٹ کے نیندیں مری کنول |
| کرتا ہے بے قرار ، ستاتا ہے رات بھر |
معلومات