| جِلا بخشی آقاؐ نے کامل مکاں کو |
| عطا کر دیں سوغاتیں بے خانماں کو |
| زمیں تا فلک غلبَۂ جلوہ سازی |
| "تھی حسرت قدم بوسی کی آسماں کو" |
| بنا مِیر کے قافلہ تھا ادھورا |
| شہِ انبیاؐ مل گئے کارواں کو |
| تبسم سے جھیلا تھا تیغِ سِتم کو |
| ادا ہدیہ تحسیں کریں ضو فشاں کو |
| زیارت مدینہ کی ہو جائے میری |
| نہیں اور خواہش دلِ شادماں کو |
| سدا فکرِ امت میں بے تاب ہوتے |
| رہا درد بھی سینَۂ بے کراں کو |
| ہو محبوبؐ کے صدقہ ناصؔر پہ احساں |
| کنارے لگا دے خدا ناتواں کو |
معلومات