| مسرور سبھی تیرے انداز ہیں شاہانہ |
| مسکین طبیعت ہے فطرت ہے امیرانہ |
| ہر لفظ ترے لب پر ہے گوہرِ یک دانہ |
| کرتا ہے دلوں پر اک تاثیر جدا گانہ |
| صحبت میں تری رہ کر دل پاک ہوں ویسے بھی |
| پھر تیری نصیحت کا انداز حکیمانہ |
| دل تیری محبّت میں دیوانے ہوئے ایسے |
| دیکھے ہیں جو آنکھوں سے اخلاق کریمانہ |
| یہ حسن کا جلوہ ہے یا کوئی کرامت ہے |
| ہر اک تری چاہت میں کیسا ہوا دیوانہ |
| ہے سر پہ ترے جب سے دستار خلافت کی |
| تُو شمع ہے ہر دل کی ہر دل ترا پروانہ |
| رہتا ہے کھلا تیرا مے خانہ پئیں سب ہی |
| مجھ پر بھی نظر ساقی ہے عرضِ فقیرانہ |
| کم ظرف ہوں محفل میں کیسے تجھے یہ کہہ دوں |
| ڈر ہے کہ نہ رہ جائے خالی مرا پیمانہ |
| ہم تیری اطاعت میں زینے سبھی طے کر لیں |
| ایسے نہ چلیں رستہ منزل سے ہوں بیگانہ |
| بیعت میں تری آئے سر آنکھوں پہ رکھتے ہیں |
| ہم تک جو پہنچتے ہیں ارشاد مسیحانہ |
| تو نبض شناس ایسا نائب ہے مسیحا کا |
| پائی ہے شفا اس نے جس نے تجھے پہچانا |
| ہو عمرِ خضر ایسی فعّال عطا تجھ کو |
| ہو جائیں سبھی حاصل مقصد ترے تابانہ |
| آئیں وہ نظر آنکھیں جو اشک بہاتی ہیں |
| مشکل ہے محبّت کے آثار بتا پانا |
| اقرار محبّت کا کرتے ہیں وہ مستی میں |
| قدرت نے جنہیں بخشی ہے جُراَتِ رندانہ |
| مجھ پر بھی نظر کر دے ہو جائے سپھل جیون |
| اک تیری محبّت میں طارق بھی ہے مستانہ |
معلومات