| ضبط کرتا آیا ہوں میں پر اب ضروری ہے |
| تشنگی مٹانے کو جامِ لب ضروری ہے |
| شعر تو سناتا میں دیکھ دیکھ کر تجھ کو |
| کیا کروں بزرگوں کا بھی ادب ضروری ہے |
| دم کرا کے آیا ہوں ہیر کے مجاور سے |
| تیرا خواب میں آنا آج شب ضروری ہے |
| لمس کی زباں میں آ بات چیت کرتے ہیں |
| گفتگو لبوں سے ہی یار کب ضروری ہے |
| بات بات پر جھگڑا ، سرد مہری ، ناچاقی |
| راستہ بدلنے کو کیا یہ سب ضروری ہے؟ |
| عشق کے مریضوں کو دیکھ کر خیال آیا |
| شہر میں حسینوں کا اک مطب ضروری ہے |
| عمر بھر قمرؔ ہم سے فیصلہ نہ ہو پایا |
| لازمی ہے کب گریہ ، کب طرب ضروری ہے |
معلومات