| جو دیپ کہ ہاتھوں میں سرِ شام لیا ہے |
| در اصل وہ طاعت ہی کا انعام لیا ہے |
| آشُفتہ تھپیڑوں کی رہا زد میں ہمیشہ |
| یہ فضل ترا ہے کہ مُجھے تھام لیا ہے |
| اک اور بھی جاں ہو تو وہ اس نام پہ قرباں |
| پھر اس نے محبّت سے مرا نام لیا ہے |
| ممکن نہیں میں گن سکوں احسان ترے سب |
| یہ تیری عنایت ہے کہ کچھ کام لیا ہے |
| کیسے مجھے بھولے گا نشّہ میں نے جو اک بار |
| مے خانے میں جا کر بھی کوئی جام لیا ہے |
| تنہائی میں چپکے سے جو نکلے کبھی گھر سے |
| ہمراہ حبیبوں کو سرِ عام لیا ہے |
| طارق کبھی سوچا ہے کہ ہے کون مقابل |
| لڑنے کو جو ہاتھوں میں قلم تھام لیا ہے |
معلومات