| رپے پیسے کے بندے ہیں کوئی انسان تھوڑی ہیں |
| جو ایماں بیچ کھائیں صاحبِ اِیمان تھوڑی ہیں |
| پجاری مال و زر کا شخص ہے حیوان سے بدتر |
| کہ اپنی نسل ہی کو کاٹتے حیوان تھوڑی ہیں |
| تمہارے منہ سے جو نکلے اسے سچ مان لیں لیکن |
| تمہاری جھوٹ کی خصلت سے ہم انجان تھوڑی ہیں |
| بنے ہیں حکمراں جیبوں کو بھرنے کے لیے سارے |
| وطن کی ہی ترقی کے لیے ہلکان تھوڑی ہیں |
| ہمارے باپ دادا نے یہاں قربان کیں جانیں |
| ہمی مالک ہیں اس گھر کے کوئی مہمان تھوڑی ہیں |
| وطن کی آبرو جگ میں ہے اسلامی تشخص سے |
| ہمارے حکمراں اس دیس کی پہچان تھوڑی ہیں |
معلومات