| مرے سلطانِ مدینہ مرے مکی مدنی |
| کیجے مہمانِ مدینہ مرے مکی مدنی |
| نخلِ امید مرا زرد ہوا جاتا ہے |
| کوئی امکانِ مدینہ ؟ مرے مکی مدنی |
| آپ کے پائے مقدس نے بڑھائی آقا |
| سَطوت و شانِ مدینہ مرے مکی مدنی |
| نعت پڑھتے ہوئے لگتا ہے مرا گھر مجھ کو |
| اک دبستانِ مدینہ مرے مکی مدنی |
| حکمتِ خاص پہ قرباں کہ مہاجر ، انصار |
| بنے اخوانِ مدینہ مرے مکی مدنی |
| کہاں میں خاک بہ سر ، خاک نشیں ، خاک سرشت |
| کہاں ایوانِ مدینہ مرے مکی مدنی |
| مجھ کو تسلیم ہر اک حرفِ ثنا ہے لاریب |
| مجھ پہ احسانِ مدینہ مرے مکی مدنی |
| ورد ہونٹوں پہ رہے صلِ علیٰ کا ہر دم |
| کبھی گردانِ مدینہ مرے مکی مدنی |
| حبِ دنیا سے تہی ہو ، رہے میرے دل میں |
| صرف ارمانِ مدینہ مرے مکی مدنی |
معلومات