| کبھی جو گھبرائے دل تمھارا نبی پہ دل سے درود پڑھنا |
| غموں سے مشکل ہو جب بھی جینا نبی پہ دل سے درود پڑھنا |
| مدینے جاکے جو چاہتے ہو، سنانا حالاتِ دل نبی کو |
| وسیلہ ہو عترتِ عبا کا، نبی پہ دل سے درود پڑھنا |
| سنبھلنا مشکل ہو زیست میں جب تو کرنا رخ جانبِ مدینہ |
| ملے گا تم کو وہیں سہارا نبی پہ دل سے درود پڑھنا |
| ہو قلب میں ذکر و فکرِ باری، رہیں یوں سانسیں تمہاری جاری |
| عمل بہ سنت شعار کرنا نبی پہ دل سے درود پڑھنا |
| اسی میں ہے ہر سکون پنہاں، اسی سے ہےدیدِِ یار آساں |
| کہ ذِہن میں رکھ کے ان کا روضہ نبی پہ دل سے درود پڑھنا |
| یہ حکم قرآنِ پاک کا ہے، ہر ایک مومن پہ فرض یہ ہے |
| سلام کے خوب توشے دینا ،نبی پہ دل سے درود پڑھنا |
| ہے درسِ شاہِ کمال یہ ہی،زبان و دل پہلے پاک کرکے |
| فنا تم اپنی انا کو کرنا نبی پہ دل سے درود پڑھنا |
| یہی مزمل ہے بس طریقہ، ہو سر نہ نیچا بہ روزِ محشر |
| زباں پہ رہتا ہے اک وظیفہ نبی پہ دل سے درود پڑھنا |
معلومات