| 17۔7۔2022/1۔4۔2024 |
| غزل |
| کہا کسی نے ، ہوئے ظلم کا سبب ، پتھر |
| مگر تھا دل کا اندھیرا، نہ تیرہ شب ، پتھر |
| جواب ان کو دعاؤں کا کیسے ملنا تھا |
| بنا لئے تھے انہوں نے تو اپنے رب ، پتھر |
| جو وہ نہ مل سکا ، ان کو تو سجدہ کرنے کو |
| پجاری لے گئے تھے اس کے گھر کے سب ، پتھر |
| اگرچہ واقعہ گزرے یہ ہو گئے برسوں |
| کہو تو گریہ و زاری سنو ، بہ لب ، پتھر |
| جُدائی ایسی ہوئی باپ کی تھی بیٹے سے |
| کہ انتظار میں آنکھیں ہوئی تھیں تب ، پتھر |
| سوال اس نے کیا ، بھائیوں سے یوسف کا |
| جواب اس کو بھلا دے سکے ، تھے کب پتھر |
| نہ جانے کیسے یہ قسمت پہ ہوں اثر انداز |
| کہ پہنے جاتے ہیں انگلی میں اب عجب پتھر |
| احد پہاڑ کے ، وہ خوش نصیب تھے کتنے |
| رسولِ پاک کے آ ئے تھے جو عقب ، پتھر |
| جہاں نماز پڑھائی گئی تھی نبیوں کو |
| نشاں ہیں قبلۂ اوّل کے با ادب ، پتھر |
| طواف کرنے گیا جب حرم تو دیکھ لیا |
| وہاں تو روندتے ہیں لوگ روز و شب ، پتھر |
| نصیب کیسا ہے اُس کا ، ہر ایک چومتا ہے |
| جو ایک کونے میں کعبے کے ہے نصَب ، پتھر |
| جہاں میں پھولا سماتا نہیں ہے وہ طارقؔ |
| وہاں پہ چھُو گئے جس کے بھی دست و لب ، پتھر |
معلومات