| “شدّت سے ہو ترا مہِ صیام انتظار” |
| شدّت سے ہو ترا مہِ صیام انتظار |
| تجھ میں خدا سے رابطہ ہوتا ہے استوار |
| رحمت ہو پہلے عشرے میں دوجے میں مغفرت |
| پائے جو تیسرا کہاں چھوتی ہے اس کو نار |
| یہ امتحان صبر کا اس میں سکوں نہاں |
| جس کے نصیب میں ہو یہ کب ہو وہ بے قرار |
| کرتا ہے سب گناہ وہ اس ماہ میں معاف |
| آئندہ اُن سے بچنے کے ساماں ہیں بے شمار |
| جو اس کے در پہ جائے گا بخشش ہی پائے گا |
| رمضان ہی پناہ حفاظت کا ہے حصار |
| صد شکر اپنی زندگی میں آ گیا ہے پھر |
| کیونکر ہو رب کی نعمتوں کا بندے سے شمار |
| قرآن کا نزول اسی ماہ میں ہوا |
| جس پر عمل بچائے جو شیطان کا ہو وار |
| لازم ہے تر رہے زباں اس کے درود سے |
| ملتی ہیں جس کی پیروی میں نعمتیں ہزار |
| طارق ہے خوش نصیب وہ جس کو ملا یہ ماہ |
| بخشش پھر اس کی ہو گئی گزرا جو اس کے پار |
معلومات