| تضمین کلام اعلیحضرت |
| حضور سیدی سندی آقائی مرشدی |
| غوث الاعظم رضی اللہ عنہ |
| از قلم سگ راہ مدینہ |
| خواجہ محمد ذیشان خان اختر القادری چشتی نظامی قلندری |
| شان اونچی ہے تری سلسلہ اعلی تیرا |
| شاہ جیلان ہوا فیض نرالا تیرا |
| سرنگوں ہوتا نہیں شاہ پھریرا تیرا |
| واہ کیا مرتبہ اے غوث ہے بالا تیرا |
| اُونچے اُونچوں کےسَروں سےقدَم اعلیٰ تیرا |
| کسکی ہمت کہ وہ دیکھےشہا چہرہ تیرا |
| نور حق سے ہوا مملو رخ زیبا تیرا |
| تیری ہیبت سے جھکا پڑتا ہےشیدا تیرا |
| سر بھلا کیا کوئی جانے کہ ہے کیسا تیرا |
| اولیا ملتے ہیں آنکھیں وہ ہے تلوا تیرا |
| تیرے خدام پہ ہر دم ہوا پہرا تیرا |
| ہوا بےخوف و خطر ماننے والا تیرا |
| لا تخف تیرے مریدوں کو ہےکہنا تیرا |
| کیا دَبے جس پہ حِمایت کا ہو پنجہ تیرا |
| شیر کو خطرے میں لاتا نہیں کُتّا تیرا |
| نسبت نبوی ہے توکیوں نہ رفیع الدیں ہو |
| نسبت زہرہ ہےتو کیوں نہ مبین الدیں ہو |
| حیدری خون ہے توکیوں نہ معین الدیں ہو |
| تُو حُسینی حَسَنی کیوں نہ محی الدّیں ہو |
| اے خِضَر مَجْمَعِ بَحْرَیْن ہے چشمہ تیرا |
| حسن والشمس الضحی کا ہے نظارہ دیکھا |
| رخ انور کی ضیا کا ہے اجالا دیکھا |
| دیکھا مازاغ کا ہے اس نے توجلوہ دیکھا |
| مصطفیٰ کے تنے ِبے سایہ کا سایہ دیکھا |
| جس نے دیکھا مری جاں جلوۂ زیبا تیرا |
| تیرے دربار میں حاکم بھی ہے تو خادم ہے |
| بادشاہوں سے بھی بڑھ کر تو ہوا حاکم ہے |
| جود کا باڑا ہو جاری یہ شہا لازم ہے |
| کیوں نہ قاسِم ہو کہ تُو ابنِ ابی القاسم ہے |
| کیوں نہ قادِر ہو کہ مختار ہے بابا تیرا |
| تیری خوشبو سے معطر ہے ولایت کا چمن |
| سارے شیوخ سےاعلی ہوئی ہےتیری پھبن |
| تیرےرخ پر ہو فدا غوث پیا باغ عدن |
| نبوی مینھ علوی فصل بتولی گلشن |
| حَسنی پھول حُسینی ہے مہکنا تیرا |
| اک نظر کیجئے مجھ پر بھی مرے مہ جلیل |
| نور سے اجلا ہو یہ دل کرو ایسی تو سبیل |
| کہ نسب اعلی ہے تیرا تو ہے روشن قندیل |
| نبوی ظِل عَلوی برج بتولی منزل |
| حَسنی چاند حُسینی ہے اُجالا تیرا |
| اپنے عشاق کے کیوں کر نہ ہوں میراں ضامن |
| ہے مریدوں کے یہی فضل خدا سے مامن |
| کیوں نہ چمکائیں گے عشاق کا میرا ں باطن |
| نبوی خُور عَلَوی کوہ بتولی مَعْدِن |
| حَسنی لعل حُسینی ہے تجلّا تیرا |
| حکم رب سے ہے ترے زیر نگیں کوہ و دمن |
| تیری سلطانی میں بستے ہیں شہا سارے وطن |
| ہرجہت میں کیوں نہ چرچا ہو ترا شاہ زمن |
| بحرو برشہر و قُریٰ سہل و حُزُن دشت و چمن |
| کون سے چَک پہ پہنچتا نہیں دعویٰ تیرا |
| ہے بھلا عطیہ ترا جو کبھی پھرتا ہی نہیں |
| تیرا ارشاد ہے حق جو کبھی ٹلتا ہی نہیں |
| مانگ لو ان کے وسیلے سے جو ملتا ہی نہیں |
| حُسنِ نیّت ہو خطا پھر کبھی کرتا ہی نہیں |
| آزمایا ہے یگانہ ہے دو گانہ تیرا |
| شاہ جیلاں مرےاحوال کی ہےتم کو خبر |
| لب ہیں خاموش مگر دل پہ تو ہے تیری نظر |
| سوز الفت سے جلے جاتے ہیں اب قلب و جگر |
| عرضِ اَحوال کی پیاسوں میں کہاں تاب مگر |
| آنکھیں اے اَبر ِکرم تکتی ہیں رَستا تیرا |
| کیسے بتلاؤں کے کیا ہیں مرے کردار میں جھول |
| نفس و شیطان کے نرغے ہیں برائی کا ہے غول |
| المدد اے شہے جیلاں مجھے اس قید سے کھول |
| موت نزدیک گناہوں کی تَہیں مَیل کے خول |
| آ برس جا کہ نہا دھو لے یہ پیاسا تیرا |
| یہ تصور ہی بہت لطف دلاتا ہے مجھے |
| طاعت رب کی یہ معراج بتاتا ہے مجھے |
| تیرا رتبہ ترا رب ہی تو دکھاتا ہے تجھے |
| قسمیں دے دے کے کھلاتا ہے پلاتا ہے تجھے |
| پیارا اللہ تِرا چاہنے والا تیرا |
| دی خدا نے تجھےآقا یہ انوکھی رفعت |
| زیر پایہ ہیں ولی تیرےیہ تیری عظمت |
| عبد قادر کو عطا کی یہ خدا نے عزت |
| اِبنِ زَہرا کو مبارک ہو عَروسِ قدرت |
| قادِری پائیں تصدّق مرے دُولہا تیرا |
| سربالیں وہ مرےآئیں گےراحت یہ ہے |
| رخ زیبا بھی دکھائیں گےعنایت یہ ہے |
| مجھ کو وہ دیکھنے آئیں گے مسرت یہ ہے |
| جان توجاتےہی جائے گی قیامت یہ ہے |
| کہ یہاں مرنے پہ ٹھہرا ہےنظّارہ تیرا |
| میں کہاں اور کہا ں آپ کا دربار شہا |
| اک نکمےکو بھلا کیسے یہ جرت ہو شہا |
| اپنی نسبت کو میں کرتا ہوں بیاں ایسے شہا |
| تجھ سے در در سے سگ اورسگ سےہے مجھ کو نسبت |
| میری گردن میں بھی ہے دُور کا ڈورا تیرا |
| در بدر پھرتےجہاں میں نہ تمہارے ہوتے |
| اپنی حالات کےہاتھوں خودہی مارے جاتے |
| تیری نسبت سےہیں صد شکر پکارے جاتے |
| اس نشانی کےجو سگ ہیں نہیں مارےجاتے |
| حَشْر تک میرے گلے میں رہے پٹّا تیرا |
| میرا گھربار فدا تم پہ اے شاہ بغداد |
| تجھ پہ مٹ جائےترا سگ اے شاہ بغداد |
| میری قسمت تری الفت ملی شاہ بغداد |
| میری قسمت کی قَسَم کھائیں سگانِ بغداد |
| ہِند میں بھی ہُوں تو دیتا رہوں پہرا تیرا |
| ہوں گنہ گار سیہ کار خطا کار سہی |
| نیکیوں سے ہوں میں خالی سہی نادار سہی |
| میں کہ بدنام سہی خام ہوں ناکام سہی |
| بد سہی، چور سہی، مجرم و ناکارہ سہی |
| اے وہ کیسا ہی سہی ہے تو کریما تیرا |
| در دولت پہ بلا اے میرے عظمت والے |
| ٹھوکروں سے تو بچا اے میرےحرمت والے |
| زلتوں میں ہوں پھنسااے میرےرفعت والے |
| تیری عزّت کے نثار اے مِرے غیرت والے |
| آہ صد آہ کہ یُوں خوار ہو ِبروا تیرا |
| تیرے ہی نام سے جانےگا مجھے ہر کوئی |
| کہ یہ ذیشان ہےبدکار نکما ہے یوں ہی |
| کام ان باتوں سے کیا مجھ کو بھلا ہوکوئی |
| مجھ کو رُسوا بھی اگر کوئی کہے گا تو یوں ہی |
| کہ وہی نا، وہ رضاؔ بندۂ رُسوا تیرا |
| ایساشیدا نہیں دیکھا جو رضا سا ہو وقیع |
| فکر ذیشان ہو ئی جس کی رضا کی سی وسیع |
| کہہ اٹھے لکھ کے قصیدہ لکھو نعت ترصیع |
| فخرِ آقا میں رضاؔ اور بھی اِک نظمِ رفیع |
| چل لکھا لائیں ثنا خوانوں میں چہرا تیرا |
معلومات