| راستوں کی گرد میں کچھ بھی نظر آتا نہیں |
| ہر صدف کی گود میں لعل و گُہر آتا نہیں |
| پہلے سارے راستے تھے میرے گھر کے آس پاس |
| اب کسی بھی راستے پہ میرا گھر آتا نہیں |
| یوں تو ہر اک کام میں اُن کو ہے کامل دسترس |
| جو کسی کو شاد کردے وہ ہنر آتا نہیں |
| خاتمہ ہے بھُوک کا نہ گردشِ لَیل و نہار |
| ایک سا ہے ہر بَرَس نَوعِ دگر آتا نہیں |
| پا گئے لقبِ کلیم اُللہ بھی کوہ طُور بھی |
| ہر کسی مُوسیٰ کی قسمت میں خِضر آتا نہیں |
| خواب میں آنے کا وعدہ کر لیا اس نے مگر |
| آیا ہو گا خواب میں لیکن نظر آتا نہیں |
| اک مسلسل کرب جو واللہ نفوذِ جان ہے |
| جستجُو جس کی رہی وہ چارہ گر آتا نہیں |
| آج خط آنا تھا ان کا اک تجسس صبح سے |
| بار بار اُٹھتی ہیں نظریں نامہ بر آتا نہیں |
| ڈھونڈتے ہو تم جسے امید وہ ناپید ہے |
| اس جہاں میں واللہ دائم مستقر آتا نہیں |
معلومات