| اے ارومہ ، یعنی خوشبو یعنی اے گلشنِ دل |
| جس سے مہکی مرے جذبات کی سونی محفل |
| اے مرے ضبط و سکوں صبر و رضا کے قاتل |
| سرمگیں آنکھ ، نظر تشنۂ رخسار پہ تل |
| . |
| کیوں دیا تھا دلِ معصوم کو بسمل کی تڑپ |
| موجِ طوفانِ بلا خیز کو ساحل کی تڑپ |
| . |
| میں کہ معصوم تھا معصوم جوانی تھی مری |
| شوخ و چنچل سی جوانی تھی دیوانی تھی مری |
| میں کہ اک شوخ جواں تھا یہ نشانی تھی مری |
| خالی سر نامہ و عنواں سے کہانی تھی مری |
| . |
| میرے اس نظم کا عنوان کیوں بن بیٹھے ہو |
| غالبِ دوراں کا دیوان کیوں بن بیٹھے ہو |
| . |
| ہاۓ وہ جوش و جنوں عشق و محبّت کی شراب |
| جذبہ و شوق و تمنا سے تھا بد مست شباب |
| ہاۓ کیا رند تھا بیچارہ ہوا خانہ خراب |
| کیا قیامت پڑی اس پر جو ہوا جینا عذاب |
| . |
| زلف و رخسار لب و لہجہ قسم کیا کہیے |
| ان کی پر جوش جوانی کا ستم کیا کہیے |
| . |
| راحتِ جاں ، تری امید پہ آیا ترے گھر |
| دل کہ آزردہ لیے آیا تھا زخمی تھا جگر |
| میری بیتابی کا تجھ پر نہ ہوا کچھ بھی اثر |
| تو نے ڈالی نہیں مجھ پر کبھی الفت کی نظر |
| . |
| پھر بھی جاناں میں تجھے رشکِ قمر کردوں گا |
| تیری چاہت کو زمانے میں امر کردوں گا |
| . |
| تجھ سے امید بھی اندیشۂ رسوائی بھی |
| ہیبت و دہشت و وحشت سے شناسائی بھی |
| صبحِ امید بھی بارات کی شہنائی بھی |
| غمِ فرقت میں شبِ ہجر کی تنہائی بھی |
| . |
| خود کو دنیا کے رواجوں سے جدا بھی کر لے |
| اپنے محبوب سے آ عہدِ وفا بھی کر لے |
| . |
| اے پری وش ! مہ و پروین کا تو حسن و جمال |
| میں کسی دشتِ جنوں خیز کا آوارہ خیال |
| تیرے نظارے سے بیمار طبیعت ہے بحال |
| تیری اک دید پہ ہے ہجر کو مطلوب وصال |
| . |
| میں نے مانا کہ پرستان میں آباد ہے تو |
| میرے اس جذبۂ بیتاب کی فریاد ہے تو |
| . |
| سلسلہ تیری عنایت کا گراں بار رہا |
| اشکِ پیہم تیری قربت کا طلب گار رہا |
| دلِ بےتاب کو بھی وعدۂ دیدار رہا |
| تیری معصوم اداؤں کا فدا کار رہا |
| . |
| اب کہ اُن شوخ اداؤں کا بھلا کیا کرنا |
| تیری قاتل سی نگاہوں کا بھلا کیا کرنا |
| . |
| چمنِ زیست کو پھولوں سے سجانا تھا تجھے |
| آتشِ قلب کو گلزار بنانا تھا تجھے |
| دلِ محزوں کی ہر آواز پہ آنا تھا تجھے |
| میرے بکھرے ہوئے خوابوں کو بسانا تھا تجھے |
| . |
| تجھ پہ افسوس ، تری شوخ جوانی پہ ہے تف |
| گل بداماں ! ترے جوبن کی روانی پہ ہے تف |
| دل نے چاہا تھا کہ حاصل ہو اسے تیرا جوار |
| غمِ دوراں کے پریشان کو آجاۓ قرار |
| وہ جو کرتا تھا کبھی چین و سکوں تجھ پہ نثار |
| تلخ گفتار سے ہے آج وہ وحشت کا شکار |
| . |
| سرخ رخسار ، لبِ شیریں پہ اب کون مرے |
| جان و دل تیرے تبسم پہ فدا کون کرے |
| . |
| کانپ اٹھے مرے روداد سے افلاک آخر |
| تیری حسرت نے کیا میرا جگر چاک آخر |
| شدّتِ کرب سے آنکھیں ہوئی نمناک آخر |
| جرمِ الفت نے کیا مجھ کو بھی بے باک آخر |
| . |
| اب نہیں خوف زمانے کے خداؤں سے مجھے |
| نشۂ تخت میں مدہوش نہ شاہوں سے مجھے |
| . |
| اب کہ مے خانۂ الفت سے صنم جاتا ہوں |
| پیکرِ ناز سے پھر کھا کے ستم جاتا ہوں |
| اپنے سینے میں چھپائے ہوۓ غم جاتا ہوں |
| اٹھ کہ مے خانے سے اب سوۓ حرم جاتا ہوں |
| . |
| نشۂ عشق میں مخمور نگاہوں کی قسم |
| شوخئ حسن کی معصوم اداؤں کی قسم |
| . |
| جارہا ہوں دلِ غمگین لیے زہرہ جبیں ! |
| مجھ کو روکے نہ کوئی جاتا ہوں رنجور و حزیں |
| مجھ کو معلوم ہے راحت نہ میں پاؤں گا کہیں |
| پھر بھی جاتا ہوں لیے دل کو میں مغرور حسیں |
| . |
| دلِ بیتاب کو تصویر سے بہلاؤں گا |
| اب کہ جاؤں گا تو واپس میں نہیں آؤں گا |
| . |
معلومات