کہاں سے بیاں ہوگی شانِ محمدﷺ
ہے لفظوں سے آگے بیانِ محمدﷺ
دو عالم ہی تنہا نہیں ہے ثنا خواں
خدا بھی ہے نغمہ کنانِ محمدﷺ
جو جبریل قرآن لیکر ہیں آئے
وہ ہے دافعِ عزّ و شانِ محمدﷺ
محبت نے جس سے ہے تعریف پائی
وہ تنہا جہاں میں مکانِ محمدﷺ
قدومِ نبی کا اثر ہے کہ اب تک
فلک ڈھونڈتا ہے نشانِ محمدﷺ
زہے صدقِ صدیق عدلِ عمر اور
حیائے غنی تحفہ دانِ محمدﷺ
عذابوں سے بچنے کا سامان ہوگا
ملے مجھ کو گر اک امانِ محمدﷺ
یہ کل انبیاء اُن کی تمہید ٹھہرے
یہ کل اولیاء ہیں بیانِ محمدﷺ
علی فاطمہ اور حسین و حسن سب
ہیں ماهِ مبیں ضو فشانِ محمدﷺ
نبی کی عطا سے ملے ایسے مرشد
ہیں نامِ خدا اور نشانِ محمدﷺ
اثر نَے ثنا گر نَے فن کار لوگوں
ہے خستہ سا سگ از سگانِ محمدﷺ

0
176