| سُنو گر حوصلہ رکھتے ہو تم تنقید سننے کا |
| نری لفّاظی ہی مقصد نہیں ہے شعر کہنے کا |
| اگر لفظوں میں سچ کو جھوٹ ثابت کر دیا جائے |
| تو پھر معیار ہے یہ قوم کے اخلاق گرنے کا |
| مرے الفاظ تب اشعار کی صورت میں ڈھلتے ہیں |
| تسلّی دل کو دے جب تجربہ سچ کو پرکھنے کا |
| جو بیٹھے آئینے کے سامنے گھنٹوں لگاتے ہیں |
| ودیعت ان کو قدرت نے کیا جذبہ سنورنے کا |
| مگر جس کو خدا نے اپنے ہاتھوں سے سنوارا ہے |
| نہیں محتاج ہوتا وہ کسی صورت بھی گہنے کا |
| مجھے سچائی کی خوشبو ہمیشہ اچھی لگتی ہے |
| اگرچہ پیش کر دے کوئی جھوٹا پھول سونے کا |
| کہاں تک ہم نے جانا ہے مسافر دو گھڑی کےہیں |
| نہ جانے وقت کب آ جائے گاڑی سے اترنے کا |
| تمہیں طارق مگر حق بات یوں ہی کہتے جانا ہے |
| سنے گا وہ جسے موقع ملے گا کان دھرنے کا |
معلومات