| یہ آنکھیں شاد ہوتی ہیں یہ دل مسرور ہوتا ہے |
| نظر کے سامنے اک چہرۂ پُر نور ہوتا ہے |
| نگاہِ مستِ ساقی سے جو پی لیتا ہے محفل میں |
| محبّت کے نشے میں رات دن مخمور ہوتا ہے |
| خموشی مسکراہٹ بھی تو اک تاثیر رکھتی ہے |
| کشش اس میں عجب اک حسن سا مستور ہوتا ہے |
| نہ جانے کیا رکھا جادو زباں میں اور بیاں میں ہے |
| کہ اس کی بات سن کر ہر کوئی مسحور ہوتا ہے |
| انہیں مل کر ہوئے قائل ہیں اکثر ان کی عظمت کے |
| کہ دشمن بھی کبھی تعریف پر مجبور ہوتا ہے |
| ضروری تو نہیں ہر شخص ہی دل کی زباں سمجھے |
| جو حق پر جاں فدا کر دے وہی منصور ہوتا ہے |
| ستم سہنا روایت ہے محبّت کی کہانی میں |
| دل و جاں پیش کر دینا یہی منظور ہوتا ہے |
| ہمیشہ ابتدا میں ابتلا بھی پیش آتے ہیں |
| زمانے کا ہمیشہ سے یہی دستور ہوتا ہے |
| نصیب ان کا ہے روشن فتح و نصرت ہیں مقدّر میں |
| کہ آخر بادشاہوں کا یہی مقدور ہوتا ہے |
| ہوئے قائل ہیں طارق ہم بھی ان کے حسن و احساں کے |
| جو آ جاتا ہے ان کے در پہ وہ مشکور ہوتا ہے |
معلومات