| لوٹ کر وقت نہ آیا تو مجھے یاد آیا |
| ہو گیا اپنا ، پرایا ، تو مجھے یاد آیا |
| بھول جانا اُسے آساں تو نہیں تھا لیکن |
| اس نے جب یاد دلایا تو مجھے یاد آیا |
| ابتدا کیسے ہوئی عشق میں کچھ یاد نہیں |
| پھر سبق اس نے پڑھایا تو مجھے یاد آیا |
| زخم تو اس نے دیے ہوں گے یہ امکان بھی ہے |
| قصّۂ درد سنایا تو مجھے یاد آیا |
| باغ میں شور تو بلبل نے مچایا لیکن |
| گیت گلشن میں جو گایا تو مجھے یاد آیا |
| اس نے سمجھا تھا مجھے ، میں نے اسے اپنا لباس |
| پیرہن اس کو بنایا تو مجھے یاد آیا |
| یہ ہنر اُس نے بہت پیار سے سیکھا ہو گا |
| اس کے گھر جا کے جو کھایا تو مجھے یاد آیا |
| اپنے گھر اُس کو محبّت تو ملی ہو گی بہت |
| ذکر جب اِس کا نہ آیا ، تو مجھے یاد آیا |
| یاد آتی ہے تو آنسو بھی نکل آتے ہیں |
| خون آنکھوں سے بہایا تو مجھے یاد آیا |
| طارقؔ آزادئ اظہار ملی ہے اب تو |
| جب کلام اپنا سنایا تو مجھے یاد آیا |
معلومات