| وہ خُدا ہے ، جُدا نہیں ہوتا |
| دل میں جب ما سوا نہیں ہوتا |
| بیٹھ جاتے ہیں آکے بُت دل میں |
| بتکدہ خود بنا نہیں ہوتا |
| جا کے واپس نہ آ سکے کوئی |
| “ورنہ دنیا میں کیا نہیں ہوتا” |
| لوگ پھر کیوں بھٹکتے پھرتے ہیں |
| کیا خِضَر رہنما نہیں ہوتا |
| کیا ہوا اب کہ لوگ کہتے ہیں |
| بندگی میں بھلا نہیں ہوتا |
| نفرتوں کے نہ بیج بوتے گر |
| زہر دل میں بھرا نہیں ہوتا |
| یہ تو صحبت کا ہے اثر ورنہ |
| کوئی اچھا ، بُرا نہیں ہوتا |
| باغ میں کب سے ہے بہار آئی |
| زخمِ دل کیوں ہرا نہیں ہوتا |
| عشق کا کچھ علاج ہو جائے |
| دردِ دل لا دوا نہیں ہوتا ! |
| سوہنی بھی ڈوب کر مرے کیا اب |
| گھر میں کچا گھڑا نہیں ہوتا |
| راستہ مجھ کو کیسے بتلائے |
| جس کو اپنا پتا نہیں ہوتا |
| بھول جاتے ہیں لوگ دنیا میں |
| کیا یہ خود ہی بتا ، نہیں ہوتا ؟ |
| آس خود ہی نہ چھوڑ دے ورنہ |
| کوئی بے آسرا نہیں ہوتا |
| آس رحمت کی کیوں رکھےجس کے |
| رحم دل میں ذرا نہیں ہوتا |
| طارقؔ اس بے ثبات دنیا میں |
| دُکھ ہو یا سکھ ، سدا نہیں ہوتا |
معلومات