| خود کو تم اس کی پنہ میں جو چھپا لو پہلے |
| اُس کی سب باتوں کو سینے سے لگا لو پہلے |
| تم نصیحت جو مجھے کرنے چلے ہو ٹھہرو |
| اک نظر اپنے گریباں میں بھی ڈالو پہلے |
| فکر کرتے ہو مرے گھر کی چلے آئے ہو |
| اپنا جلتا ہوا گھر دیکھو بچا لو پہلے |
| روشنی بانٹنے نکلے ہو زمانے بھر کو |
| اپنی راتیں نہ سہی دن تو اجالو پہلے |
| بچ گئے پہلے تو آئندہ بھی بچ جائیں گے |
| تم ہمیں چھوڑو ابھی خود کو سنبھالو پہلے |
| خود کشی کر کے بشارت تو نہ دو جنّت کی |
| زندگی موت کے قابل تو بنا لو پہلے |
| بات کرتے ہو کسی اور سفر کی لیکن |
| اِس سفر میں جو لگے کانٹے نکالو پہلے |
| اُس نے ستّاری کا وعدہ تو کیا ہے طارق |
| تم بھی کمزوری کسی کی نہ اُچھالو پہلے |
معلومات