| سراب لکھا ہے یا وہ شراب لکھا ہے |
| ترے سوال کا ہم نے جواب لکھا ہے |
| لکھے ہیں اوروں پہ تنقید و تبصرے لیکن |
| ہمیشہ آپ کو ہم نے گلاب لکھا ہے |
| اسی کا حسن چھلکتا ہے صفحے صفحے پر |
| اسی کے نام کا ہر ایک باب لکھا ہے |
| مرے بدن کو نمی کھا گئی ہے اشکوں کی |
| کہ جیسے دریا نے ساحل پہ آب لکھا ہے |
| بھٹک رہے ہیں مسافر وصال کے اب تک |
| کتابِ زیست میں ہجرت کا باب لکھا ہے |
| اگر ہوا ہے تمہیں عشق تم یہ جان رکھو |
| کتابِ عشق میں اک غم کا باب لکھا ہے |
| میں اس لیے بھی خوشی کو تلاش کرتا نہیں |
| مرے نصیب میں غم کا نصاب لکھا ہے |
| میں جن کے واسطے دنیا ہی چھوڑ آیا ہوں |
| انہوں نے مجھ کو ہی احسنؔ عذاب لکھا ہے |
معلومات