| جلتا ہے صبح و شام دیا اس دلان میں |
| آخر مقیم کون ہے دل کے مکان میں |
| سردار ہوں کبھی تو سرِ دار ہوں کبھی |
| کتنے ہی پیچ و خَم ہیں مری داستان میں |
| بزدل دلوں کی فوج مقابل کھڑی ہے اور |
| نکلا ہوں صرف حوصلہ لے کر کمان میں |
| ہر قہقہے میں دردِ جگر کی ہے داستاں |
| اشکوں کا ایک دریا چھپا ہے چٹان میں |
| مشکل پڑی تو ساتھ کوئی ہم نوا نہیں |
| کل تک تو ہمسفر تھے بڑے کاروان میں |
| کہنے کو میرے سامنے بیٹھا ہے میرا یار |
| صدیوں کا فاصلہ ہے مگر درمیان میں |
| اک جستجو میں ہم نے گزاری تمام عمر |
| منزل ملی تو ٹوٹ کے بکھرے تکان میں |
| تھک کر جو آج ریل کی پٹڑی پہ جا گرا |
| کتنا ضعیف دل تھا کسی نوجوان میں |
| اہلِ نظر کی آنکھ پہ پردہ ہے خوف کا |
| چھالے پڑے ہیں اہلِ زباں کی زبان میں |
| میرے جواب اتنے غلط بھی نہیں مگر |
| پرچہ غلط ملا ہے مجھے امتحان میں |
| میں شب جلا رہا تھا اسامہ تمھارے خط |
| دل بھی ملا ہے صبح مجھے راکھ دان میں |
معلومات