| *غزل* |
| رکی ہوا پہ کہانی تلاش کرتا ہوں |
| حروفِ ابرِ معانی تلاش کرتا ہوں |
| نصابِ رنگ ابھاروں رِدائے کاغذ پر |
| کہ بے زباں ہوں زبانی تلاش کرتا ہوں |
| یہی تو اپنا گماں زار ہے رہے آباد |
| جُھکے شجر پہ جوانی تلاش کرتا ہوں |
| جہاں سے ریگِ بدن نے اٹھا لی انگڑائی |
| ندی کی پیاسی روانی تلاش کرتا ہوں |
| ورق الٹ جو رہا ہوں بُھلا بُھلا کے اسے |
| کسی کی یاد دِہانی تلاش کرتا ہوں |
| کئی دنوں سے یہی مشغلہ خلافِ نظر |
| میں اپنے آپ کا ثانی تلاش کرتا ہوں |
| سرابِ دشت میں سایا ترا پڑا شیؔدا |
| تمہاری آنکھ کا پانی تلاش کرتا ہوں |
| *علی شیؔدا* |
معلومات