| خدا کر کے آئی ہے باری مبارک |
| مبارک مبارک ہو شادی مبارک |
| مُعطّر فضا ہے خوشی کا سماں ہے |
| نکاح کی یہ سُنّت ہو پیاری مبارک |
| پئیں دید کے خوب کثرت سے شربت |
| رہے کوئی باقی نہ آنکھوں کی حسرت |
| تڑپتا رہے دل جدائی میں ان کا |
| محبت کو دو اور قیدی مبارک |
| لگے تلخ کوئی اَگر بات اُس کی |
| سجا مُسکُراہٹ لبوں پر ذرا سی |
| کرو کُھل کہ تعریف ہر اک ادا کی |
| محبت کی ہو ضربِ کاری مبارک |
| لڑائی اگر ہو تو میٹھی سی ورنہ |
| کبھی ایک دوجے سے تم نہ جھگڑنا |
| مَنا جلد لینا اگر روٹھ جائے |
| منانے کی ہو ذِمّہ داری مبارک |
| کہیں زندگی میں اگر آئے مُشکِل |
| ہوں شانہ بشانہ یہ منزِل بَمنزِل |
| نہ چھوٹے کبھی اِن کا دامن خُدایا |
| اِنھیں ساتھ ہو عمر ساری مبارک |
| مدینے کو جائیں تو مَکّے بھی جائیں |
| سہانے سے سپنے یہ مل کر سجائیں |
| کھِلیں پھول پیارے سے ان کے چمن میں |
| چمن کو ہو بادِ بہاری مبارک |
| بنیں نیک بچے سبھی اِن کے یارب |
| ملے اُن سے آنکھوں کو ہردم ہی راحت |
| کریں دین کی خوب خدمت وہ سارے |
| اِنھیں ایسی پرہیزگاری مبارک |
| ہوں زیرکؔ کی مقبول ساری دعائیں |
| خدایا نچھاور ہوں تیری عطائیں |
| کریں سب کو راضی رِضا تیری پائیں |
| ہو جنت کی ان کو مُنادی مبارک |
معلومات