| کہا، کمال لکھتے ہو |
| احساسوں کا میری احتمال لکھتے ہو |
| کسی کے چہرے کو چاند |
| گالوں کو بدلی |
| آنکھوں کو شمعیں |
| گردن کو سبُو |
| لبوں کو جام |
| اور |
| زُلفوں کو جال لکھتے ہو |
| کُچھ مُجھ پر بھی لکھو گے؟ |
| اپنی تصویر بھیجوں گی تُمہیں |
| لکھو گے کہ |
| میں سُندر ہوں |
| میری آنکھوں کو کیا کہو گے؟ |
| سمندر کہو گے |
| جھیل کہو گے |
| چراغ، شمع یا پھر سیاہ رات کا جمال لکھو گے؟ |
| اچھا میرے گالوں پہ |
| شفق کو استعارہ کرو گے |
| یا پھر رنگوں کی برکھا کہو گے |
| یا پھر |
| کسی پہلی رات کی دُلہن کی لجا لکھو گے؟ |
| دھنک لکھو گے یا حیا لکھو گے؟ |
| روئی سی بدلیاں تو سب کہتے ہیں |
| یہ بتاؤ تُم کیا لکھو گے؟ |
| دہکتے ہوئے گُلاب لکھو گے؟ |
| سُرخ بھاپ کے گرداب لکھو گے؟ |
| گردن کو دیکھ کر |
| کیا اُبھرے گا ذہن میں؟ |
| سبُو تو پُرانی ہوئی |
| کوئی گُلدان لکھ دینا |
| گُلدان جس میں گُلاب سُوکھے پڑے ہوں |
| اچھا چلو |
| تُم اسے واجبِ قتال لکھ دینا |
| لبوں کو شراب مت لکھنا |
| تُم انہیں حلال لکھ دینا |
| بانہوں کو دیکھ کر |
| کسی مصور کا خیال لکھ دینا |
| زُلفوں کو چاہے تُم |
| بلائے جان اور ایک وبال لکھ دینا |
| ارے جو تُم چاہو میری جاں |
| وہی احوال لکھ دینا |
| مگر سُنو! |
| یہ سب تو ظاہری ہے |
| اک دن گل جائے گا |
| یہ جوبن میرا ڈھل جائے گا |
| تُم یوں کرو |
| کہ میرے دل کا حال لکھ دو |
| میری دھڑکنوں میں کئی راز کی باتیں ہیں |
| وہ باتیں۔۔ |
| جو خود سے بھی کر نہیں سکتی |
| کروں تو لاج آتی ہے |
| تُم یوں کرنا |
| مُجھے ایک عام سے چہرے والی |
| عام سے حُلیے والی |
| عام سی سوچوں والی |
| لڑکی لکھنا |
| لیکن |
| مُجھے میرے جذبوں میں بہت ہی کمال لکھنا |
| تُم میرے اندر کے سب ہی احوال لکھنا |
| اک زود رنج مٹیار لکھنا |
| تُم مُجھے بس بدحال لکھنا |
| اُداسیوں کی زال لکھنا |
| میرے خد و خال لکھنا |
| یہ بھی لکھنا کہ |
| تُم پہ مر مٹی ہوں میں |
| لیکن |
| "مر"کے بعد وقفہ دینا لمبا سا |
| پھر مُجھے "مٹی " لکنا۔۔۔۔۔۔ |
| فیصل ملک |
معلومات