| دل ہے دریا سا اور پانی تُو |
| نغمگی شعر کی ، روانی تُو |
| ایک قطرہ جو چشمِ نم میں ہے |
| اس کی کرتا ہے قدر دانی تُو |
| صُبح کا میں چراغ بجھتا ہوا |
| تا ابد شمعِ حکمرانی تُو |
| ذرّے ذَرّے میں نقش ہیں تیرے |
| سارے پیغام ، آسمانی تُو |
| کب سے میں ہوں فقیر راہوں کا |
| جن میں کرتا ہے میزبانی تُو |
| میں جو خود سے لگوں جدا ہونے |
| میری کرتا ہے پاسبانی تُو |
| الاماں تلخ ہو زباں میری |
| مجھ کو کہتا ہے خاندانی تُو |
| تجھ سے جیتا ہوں تجھ پہ مرتا ہوں |
| سچ کہوں میری زندگانی تُو |
| ایک دھڑکا سا دل میں رہتا ہے |
| مجھ سے کہہ دے نہ لن ترانی تُو |
| طارقؔ اس کے لئے جھُکا سر کو |
| چھوڑ دے مطلق العنانی تُو |
معلومات