| دیکھے بھالے ہیں ہمارے صاحبِ دستار سب |
| باعثِ توہینِ انسانی ہیں یہ معیار سب |
| میں نے زینے طے کیے کتنی مشقت سے مگر |
| پھر چلے آئے گرانے کے لیے مکار سب |
| پاس دانے ہوں تو یہ منڈلائیں گے چاروں طرف |
| چھوڑ جائیں گے مصیبت میں مگر دلدار سب |
| جب الگ ہوں گے تو اندازہ لگائیں گے ضرور |
| یہ پجاری آپ کی کرسی کے ہیں سرکار سب |
| اک مری "ہاں" کے اشارے پر بچھے جاتے تھے جو |
| آج استدعا پہ بھی کرتے رہے انکار سب |
| میں نے حصے کی کسی کے کب چرائی ہے خوشی |
| کیوں ہوئے جاتے ہیں مجھ کو درپئے آزار سب |
| میں نے سمجھا تھا یہاں جینا بہت آسان ہے |
| رفتہ رفتہ وا ہوئے پھر زیست کے اَسرار سب |
| اپنے اپنے فن کے ماہر ہیں مگر معصوم ہیں |
| حسرتؔ و درویشؔ و بیرمؔ، انجمؔ و بیدارؔ سب |
| سر قلم کس کا کروں کس کو معافی دوں رشیدؔ |
| جب صفِ دشمن میں شامل ہیں مرے سالار سب |
| رشید حسرتؔ، کوئٹہ |
| ۱۲، نومبر، ۲۰۲۶ |
معلومات