| ملتی ہے خوشی، پاتے ہیں غم حسبِ تمنّا |
| احباب جو کرتے ہیں ستم حسبِ تمنّا |
| مشکل سے تھما آنکھوں سے بوندوں کا تسلسل |
| رکھ لے گی دھنک میرا بھرم حسبِ تمنّا |
| جانا بھی نہیں چاہتا، جانا بھی مگر ہے |
| تھامے گا کوئی بڑھ کے قدم حسبِ تمنّا |
| بِن مانگے عطا ہوتے رہے، بھاگ بھرا ہوں |
| یاروں کے ستم اور کرم حسبِ تمنّا |
| مہکی سی فضائیں ہیں گُہر بار ہوا ہے |
| زلفوں میں تری پائے ہیں خم حسبِ تمنّا |
| قدغن تو مِرے شعر و سخن پر ہے برابر |
| لکھتا ہے مگر میرا قلم حسبِ تمنّا |
| حسرت نہ کوئی حاکمِ دوراں سے توقع |
| اُٹھنے ہیں بغاوت کے عَلم حسبِ تمنّا |
| رشِید حسرتؔ |
معلومات