| ہر دم نبی پہ مولا تیرا سلام ہو |
| مدحت گرِ حبیبی ہستی تمام ہو |
| راہِ نبی پہ جائیں یہ مال و زر ہیں جو |
| آلِ لبیبِ رب پر یہ جاں تمام ہو |
| دیکھوں میں دل میں اپنے نوری تجلیاں |
| عشقِ نبی میں میری ہر صبح و شام ہو |
| اس حُسنِ الضُحیٰ سے پردے اُٹھیں گے پھر |
| میلانِ وصل ہی گر میرا اِمام ہو |
| دائم رہوں میں ڈوبا اس شوقِ دید میں |
| خاطر حبیبِ داور ہر کام تام ہو |
| قدموں کو بوسہ دے پھر افلاک کا عروج |
| ان کے اسیروں میں گر فدوی مدام ہو |
| محفل ثنائے خواجہ دائم سجی رہے |
| کونین میں سکوں کا یہ اہتمام ہو |
| قابل نہیں ہوں اس کے کِس منہ سے کہہ سکوں |
| دیکھوں رُخِ ضُحیٰ کو لب پر سلام ہو |
| جرات کیا حزیں کی ان کی ثنا کرے |
| بَر حالِ ما کرم کن بَردوں میں نام ہو |
| سر چشمہ خیرِ کل کا ہیں وجہٖ کائنات |
| مولا یہ فیض ان کا فدوی پہ عام ہو |
| بن کر رہوں میں چاکر خدمت میں آپ کی |
| ان کی نظر جو آئے راضی غلام ہو |
| چاہے جو سُرخروئی پوری ملے اسے |
| وہ عشقِ مصطفیٰ میں بالائے بام ہو |
| محمود جس سخی کا ادنیٰ غلام ہے |
| چوکھٹ پہ چاہے ان کی اس کا قیام ہو |
معلومات