| یوں ہی نہیں لوح و قلم آیا مِرے آگے |
| تھا مدحتِ سرورؐ کا اِرادہ مِرے آگے |
| کیا خوب ثنا ہوتی ہے قرآن کے ہوتے |
| کُھلتے ہیں مضامین یوں کیا کیا مِرے آگے |
| ہوتی ہے شَبِ تار مِری تجھ سے منور |
| رہتا ہے تَرے رُخ سے اُجالا مِرے آگے |
| ہے چاند تَرے چہرے کا پرتو مِرے نزدیک |
| ہے شمس تَرے نور کا ٹکڑا مِرے آگے |
| جاؤوک کا فرماں ہے تسلی مِرے حق میں |
| دربار تمہارا ہے پَناہا مِرے آگے |
| الزام نہ دے سر کو جھکانے کا اے واعظ |
| تُو دیکھ کہ آیا ہے مدینہ مرے آگے |
| دہلیزِ دَرِ شاہ ہے سدرہ مِرے نزدیک |
| ہے عرش, مزارِ شہِ والا مِرے آگے |
| جز احمدِ مرسل نہیں آقا مجھے منظور |
| جز مرتضی کوئی نہیں مولا مرے آگے |
| ہے شاہِ سَلاطینِ زماں سے مجھے نسبت |
| جُھکتے ہیں سَلاطینِ زمانہ مِرے آگے |
| وہ مالکِ جنت وہ شبیہانِ محمد |
| حسنین کا رہتا ہے یہ رتبہ مرے آگے |
| ہو جو تَرے دامن کا سہارا مجھے حاصل |
| پھر کیا تَپَش و وحشتِ صحرا مرے آگے |
| دیتا ہے مجھے لطف و مزہ نامِ محمد |
| کیا چیز ہے شیرینی و میٹھا مِرے آگے |
| رکھتا نہیں ہوں مال و زرِ دہر کی خواہش |
| ہر لمحہ ہے کنزِ شہِ والا مِرے آگے |
| میں کُنجِ لَحد سے بڑے آرام سے نکلا |
| تھا شافعِ محشر کا بھروسا مِرے آگے |
| شاہدؔ ہوئی جب سے نَظَرِ رشکِ مسیحا |
| ٹکتے ہی نہیں ہیں غمِ دنیا مِرے آگے |
| محمدشاہدؔعلی صابری |
معلومات