| سُن کے سوھنی کی کہانی داستاں سمجھا نہ کر |
| عشق میں دیتا ہے جاں کوئی کہاں سمجھا نہ کر |
| ہر کوئی تعبیر پائے گا جو دیکھے گا اسے |
| زندگی کو ایک خوابِ رائیگاں سمجھا نہ کر |
| ساتھ لے کر ان کو چل جو بھی ترے ہمراہ ہیں |
| صرف اپنے جسم و جاں کو کارواں سمجھا نہ کر |
| اک حقیقت ہے تجھے کرنا ہے جس کا سامنا |
| اُس عدالت کو کبھی وہم و گماں سمجھا نہ کر |
| ہے کسی کے ہاتھ سے چلتا نظامِ کائنات |
| ہے وہی مالک اِسے اپنا جہاں سمجھا نہ کر |
| پھول جب کِھل جائیں سبزہ پھیل جائے ہر طرف |
| ہے علامت یہ بہاروں کی خزاں سمجھا نہ کر |
| تشنہ لب ہوں لوگ جب آئیں نظر تُجھ کو سراب |
| پھر بیابانوں کو ہی تُو گلستاں سمجھا نہ کر |
| معجزوں کے ساتھ ہوتا ہے خدا کا اقتدار |
| تُو مداری کے تماشوں کو نشاں سمجھا نہ کر |
| خوبصورت میرا لہجہ ہے مری شیریں زباں |
| تُو اسے طارق کا معمولی بیاں سمجھا نہ کر |
معلومات