| چشمِ نم سے واقعہ میں نے سُنا ہے آج جو |
| جی میں آیا ہے سناؤں آپ کو بھی دوستو |
| میں گیا مطبع پہ جب اپنی کتابوں کے لئے |
| بیٹھنا مجھ کو پڑا کچھ دیر باتوں کے لئے |
| مالکِ مطبع تھا ہاتھوں سے ہوا کو جھل رہا |
| اور بھی کچھ ذہن میں تھا اس کے شاید چل رہا |
| میں نے پوچھا تو وہ بولا معذرت کرتا ہوں میں |
| کسٹمر سگریٹ پی کر ہے گیا ڈرتا ہوں میں |
| پھر کہا اس نے لکھا ہے میں نے سگریٹ مت پیو |
| باز آتے ہی نہیں کرتا تو ہے دل ، ڈانٹ دو |
| پھر وہ یہ کہنے لگا میں خود رہا ہوں مبتلا |
| جانتا ہوں میں نشہ سگریٹ کا ہے ہی بُرا |
| اک زمانے میں بڑے سگریٹ پی جاتا تھا میں |
| اک کے بعد اک دوسرے کا لطف بھی پاتا تھا میں |
| یاد پڑتا ہے نیا آیا تھا میں پر دیس میں |
| کام وہ کرنا پڑا کرتا نہ تھا جو دیس میں |
| اک بڑے سے نام والی چین کا اسٹور تھا |
| میرا خالی شیلف بھرنے پر ہی سارا زور تھا |
| دن ذرا مشکل تھے لیکن تھا گزارا ہو رہا |
| رات بھر میں کام کرتا دن کو تھا میں سو رہا |
| میری بچی جس کی ہو گی عمر تب تو ایک سال |
| آگئی وہ ساتھ ماں کے شوخیوں کی ، تھی مثال |
| گھوم کر اسٹور میں وہ خوش رہی ، کہنے لگی |
| اک کھلونا ہے پسند آیا وہ لے کر دو ابھی |
| میری قیمت پر نظر بھی اتفاقاً جا پڑی |
| پونڈ دیکھے تیس سے اوپر تو بیوی بھی ڈری |
| ڈانٹ کر میں نے کہا، ہم کیسے لے سکتے ہیں یہ |
| اس طرف دیکھو کھلونے کچھ ادھر سستے ہیں یہ |
| لے نہ سکتے تھے کھلونا ، اس کو پھر بہلا دیا |
| دوسرا شاید کھلونا لے کے بس پُھسلا دیا |
| وہ مگر کہتی رہی اس کو کھلونا چاہئے |
| وہ پسند آیا تھا جو بس اور کچھ نہ چاہئے |
| اپنی ضد پر گھر کو جاتے وقت بھی قائم رہی |
| میں بھی غصّے میں تھا کیفیّت یہی قائم رہی |
| وہ تو رو دھو کر چلی آئی خموشی چھا گئی |
| اس کی پہلی ضد تھی شاید وہ ذرا کُملا گئی |
| میں نے کونے پر دکاں سے جب لئے سگریٹ تو |
| کہہ دیا مالک نے مہنگا ہے بچا باقی ہے جو |
| میں نے گیارہ پونڈ میں سگریٹ کا اک پیکٹ لیا |
| جو مرے ساتھی تھے اس میں سے سبھی کو اک دیا |
| دیکھتے ہی دیکھتے پیکٹ ہوا نظروں سے گُم |
| سوچتا میں رہ گیا کہ اب کہاں جاؤ گے تُم |
| پھر میں نکلا ڈھونڈنے کچھ اور باقی رات تھی |
| اور سگریٹ کے بنا رہنا تو مشکل بات تھی |
| اس دکاں پر اب ہوئے سگریٹ سارے ختم تھے |
| کچھ ورق ، فلٹر ، تمباکو ہی بچے اب نرم تھے |
| پونڈ پورے تیس اس کو پھر سے اب دینے پڑے |
| اپنی مجبوری سمجھ کر جو ملے ، لینے پڑے |
| لے کے تمباکو جو میں پہنچا ہوں پھر اسٹور پر |
| مجھ کو مالک نے کہا دیکھو ذرا اس ڈور پر |
| میں گیا تو سامنے ہی وہ کھلونا تھا پڑا |
| میری بیٹی نے کیا تھا جس پہ ہنگامہ بپا |
| میں نے سوچا اس کی ضد تو میں نہ پوری کر سکا |
| تھا بہت مہنگا کھلونا میں نہ پورا پڑ سکا |
| پر مرے سگریٹ پر میرا ہے جو خرچا ہوا |
| اس کھلونے کی وہ قیمت سے کہیں آگے بڑھا |
| اپنی بچی کا جو چہرہ سامنے آیا مرے |
| میں نے غصّے سے نکالے تھے جو تمباکو لئے |
| بِن میں ان کو پھینک کر جو چین میں نے پا لیا |
| بعد اس کے ہاتھ میں ، سگریٹ اب تک نہ لیا |
معلومات