| وہ جو عرفان کے چشمے سے پلاتا ہے مجھے |
| روز قدرت کا نیا جلوہ دکھاتا ہے مجھے |
| یوں تو دیدار نصیبوں سے ہوا کرتا ہے |
| وہ قریب آنے کا مژدہ بھی سناتا ہے ، مجھے |
| حسن سے اس کے تو شرماتے ہیں مہتاب و گلاب |
| پھر یہ کیوں کہتے ہو دیوانہ بناتا ہے مجھے |
| اس سے ملنے کی تمنّا مجھے بیتاب رکھے |
| آ کے خوابوں میں مرے کون جگاتا ہے مجھے |
| کس کی یادوں میں گزرتا ہے مرا دن یارو |
| رات کے پچھلے پہر بھی وہ اٹھاتا ہے مجھے |
| جب کہیں کوئی حسیں ہم کو نظر آ جائے |
| اک فقط وہ ہے کہ یاد آ کے ستاتا ہے مجھے |
| اس کی رنگینئ لب دیکھ کے ہے یاد آیا |
| خندہ گل اپنی طرف کیوں لئے جاتا ہے مجھے |
| دل کا شاگرد ہوا ، پہنچا کہاں ہوں طارق |
| کیا سبق خاص یہ استاد پڑھاتا ہے مجھے |
معلومات