| جو اس سے اپنا تعلق اگر بچا نہ سکے |
| تو سمجھیں گے کہ ہم عمرِ خضر بچا نہ سکے |
| اِدھر تھا نعرہِ ھو اور اُدھر تھا تختہِ دار |
| جنہوں نے دل کو بچایا وہ سر بچا نہ سکے |
| ہم عشق میں سرِ بازار لُٹنے سے دل کو |
| بچانا چاہتے تو تھے، مگر بچا نہ سکے |
| بچاتے کیسے محبت میں ڈوبتے دل کو! |
| جب اس پہ پڑنے سے اپنی نظر بچا نہ سکے |
| جلائے لاکھ دیے پھر بھی ان اندھیروں سے |
| ہم اپنی بستی تو کیا، اپنا گھر بچا نہ سکے |
| اگرچہ فوج محافظ تھی سرحدوں کی مگر |
| ہم اپنے ملک میں اپنا ہنر بچا نہ سکے |
| کلام کرنے وہ آئے تھے ہم سے جب ثاقبؔ |
| ہم اپنے لفظوں کے زیر و زبر بچا نہ سکے! |
معلومات