اے نازنیں ، اے دل رُبا ، اے مہرباں کچھ تو بتا
رشکِ زمیں ہے کیوں فلک کیا ہے وہاں کچھ تو بتا
محفوظ تھے جو آج تک تیرے دلِ غمگین میں
وہ رازِ غم مجھ پر ہوئے ہیں کیوں عیاں کچھ تو بتا
مرشد مرے ، یاور مرے ، کیا دیکھتا ہے مجھ میں تو
عشق و جنوں ، فہم و ذکا ، سود و زیاں کچھ تو بتا
میں زندگی کے پیچ و خم سے آشنا ہوں ہی نہیں
لکھوں بھلا کیسے میں تیری داستاں کچھ تو بتا
کیوں مبتلا ہے فاختہ آہ و فغاں میں ،کیا ہوا
کیا لٹ گیا ہے پھر سے اس کا آشیاں کچھ تو بتا
سوز و گداز اب پہلے جیسا وعظ میں تیرے نہیں
بجھتی نہیں ہے تشنگی جاؤں کہاں کچھ تو بتا

0
87