| اے عاشقوں شرف ہے یہی اربعین کا |
| مٹتا ہے اس جگہ پہ ہی سرحد کا فاصلہ |
| جاپان و روس،ترکی و لبنان و لیبیا |
| ہر ملک بن کے آگیا عاشق حسینؑ کا |
| ہوتا ہے دور فرق سفید و سیاہ کا |
| بندہ ہے ہر بشر یہاں عالی پناہ کا |
| ہر فرقِ رنگ و نسل مٹاتی ہے اربعین |
| اک دوسرے سے سب کو ملاتی ہے اربعین |
| انسانیت کا درس سکھاتی ہے اربعین |
| آؤ چلو سفر پہ بلاتی ہے اربعین |
| توفیق یہ ملی ہے تمہیں کردگار سے |
| خود کو ملا دو ابنِ علیؑ کے جوار سے |
| موکب لگے ہوئے ہیں یہاں سے وہاں تلک |
| نعمت کا سلسلہ ملا دیکھا جہاں تلک |
| اک شور "یا حسینؑ" کا ہے آسماں تلک |
| حیرت میں غرق ہو گئے وہم و گماں تلک |
| جس کا نہیں خیال وہ نعمت یہاں ملی |
| دھوتے ہی پاؤں دیکھئے شہرت یہاں ملی |
| یہ سال بھر کماتے ہیں اس دن کے واسطے |
| تاکہ یہ کام آ سکیں سب زائرین کے |
| ہر اک کھڑا ہے قلب میں خواہش لئے ہوئے |
| خدمت کا زائرین کی مجھ کو شرف ملے |
| چشمِ ملائکہ میں یہ عالی جناب ہیں |
| زائر ہیں یہ حسینؑ کے یہ انتخاب ہیں |
| ہیں راہِ کربلا میں جو حبدار کے قدم |
| حسنینؑ و مصطفیؑ کے عزادار کے قدم |
| عالی یہاں دباتے ہیں نادار کے قدم |
| گھر میرا اور شاہؑ کے زوّار کے قدم |
| منظر میرے مکان کا جنت سا ہو گیا |
| اک رات آکے شاہؑ کا زائر جو سو گیا |
| کالے لباس پہنے ہوئے گرد میں اٹے |
| رستے کی سختیوں سے ہیں پاؤں پھٹے پھٹے |
| کثرت ہے اتنی چلتے ہیں سارے سٹے سٹے |
| اللہ جلدی عشق کا یہ راستہ کٹے |
| چہرے پہ ان کے خاک ہے بالوں میں خاک ہے |
| پاؤں پھٹے ہیں پاؤں کے چھالوں میں خاک ہے |
| جو بڑھ رہے ہیں دل کی حرارت کے واسطے |
| ہر اک قدم ہے شہؑ کی محبت کے واسطے |
| جو آ نہ پائے شہؑ کی زیارت کے واسطے |
| ان کو بھی یاد رکّھیں اُخُوَّت کے واسطے |
| خادم تمہارا ایسے شرف سے جو دور ہے |
| مولاؑ معاف جو بھی ہمارا قصور ہے |
معلومات