| ہمارے نام بھی کوئی سنہری شام ہو جائے |
| کہیں ایسا نہ ہو یہ زندگی ناکام ہو جائے |
| ہمیں ساقی سے پھر ایسی شکایت کیا ، سفارش کیا |
| نگاہوں ہی نگاہوں میں اگر اک جام ہو جائے |
| نگاہِ لطف ہو جائے اگر ، بیمار اچھا ہو |
| مسیحا کو منائیں گے ، اگر وہ رام ہو جائے |
| محبّت میں ، ہماری ہی ، کمی شاید رہی ہو گی |
| محبّت کیوں کسی کے سامنے نیلام ہو جائے |
| کوئی اک آدھ ظالم تو نظر آتا ہے گلیوں میں |
| مگر یہ کیا کہ سارا شہر خوں آشام ہو جائے |
| دعا دی اس لئے قاتل کو ہم نے تا دمِ آخر |
| ہمیں اچھا نہیں لگتا کہ وہ بدنام ہو جائے |
| کسی سے پیار کرنے کو ہماری دشمنی سمجھا |
| ہمارا ذکر جب آئے ، زباں دشنام ہو جائے |
| ہمیں ملنے سے کترائے ، کوئی تو مصلحت ہو گی |
| عدُو ڈرتا نہ ہو ایسی خبر تو عام ہو جائے |
| خوشی اُس کی ہمیں اِس زندگی سے بڑھ کے پیاری ہے |
| ہے خواہش ، جان دینے سے ، اسے آرام ہو جائے |
| خرَد کے سامنے شرمندگی ہو گی محبّت کو |
| جنوں کیا جو مطیعِ قدغنِ احکام ہو جائے |
| مداوا فرقتوں کا ہو ملے جو وصل کا موسم |
| بہاروں سے خزاؤں کا اگر انجام ہو جائے |
| ہمیں طارقؔ وہ ٹھہرانے کی مجرم جب کریں کوشش |
| تو ثابت بے وفائی کا ، غلط ، الزام ہو جائے |
معلومات