| بادِ صرصر کیا اٹھی صحرا سے گھر تک آگئی |
| رقص کرکے چھت سے اتری صحنِ درتک آگئی |
| گردشِ کون و مکاں میں ہم بھی شامل ہوگئے |
| جنبشِ شوقِ جنوں جو دل سے سر تک آگئی |
| ٹوٹتا رہتا ہے کاسہ اعتبارِ عشق میں |
| مسئلہ ہے بات اپنی کوزہ گر تک آگئی |
| ہے فلک زارِ دیارِ خواب، مسکن چاند کا |
| چاندنی کب شب گزیدہ چشمِ تر تک آگئی |
| اپنی عریانی کو پہنایا ہے خود ہم نے کفن |
| اک سفر کی دھول تھی رختِ سفر تک آگئی |
| کون سا موسم ہے چرچا ہے سہانی دھوپ کا |
| ہجر زادہ ہوں تپش دل کے شجر تک آگئی |
| آرزو میں ڈھل گئی شیؔدا محبت کی خلش |
| آخری منظر سے تھی پہلی نظر تک آگئی |
معلومات